19 | 03 | 2024
Neue Artikel

Alderle ! De Dresel machd zu!

31.5.2014

Als´mer vor 30 Johr nach Schdupferich gezooge sin un beim Merkle Egon un de Gabi g´wohnd hen, hasch hald samsdags morjens dei Weggle beim Dresel g´hold un du hasch glei g´mergd, dass des, was do holsch, saumäßig guud schmeggd. Also bisch jeden Samsdag do no gange.

Mid de Zeid hasch de Oind odda Anner kenne g´lernd un s´war ned blos wäge de Weggle un de Brezel, dass do no gange bisch, du hasch a Leid gedroffe, mid denne ä Schwädzle halde hasch kenne. Wenn em halwa Achde komme bisch, hasch genau g´wissd, wen dreffsch. Manchmol hasch a noch ä halb Schdund schbäder, wenn widder vorbeig´fahre bisch, noch welche g´sähne, die vor lauder schwädze vergesse hen, dass ihre Fraue dähoim aigendlich gern Friehschdigg g´machd hedde!!!

S´had´er a gar nix ausg´machd, wenn bis zu de Schdaffel nunner g´schdanne bisch, weil´de immer widder iwwer alles Meegliche unnerhalde hasch kenne. Middlerweil hasch a genau g´wissd, wenn de Oind odda die Anner vor´der war, dasses lenger dauerd, weil die ned nur fir die aige Familie eikaafd hen sondern die ganz Verwandschafd midversorgd hen.

S´isch richdig schaad, dass des jedzd bletzlich aus sei soll. Do gehd irgendwie widder ä Schdigg Schdupferich verlore. Wenn so zrigg dengsch, wie des schee war, wenn vor allem d´Fraue nachem eikaafe noch ä Schwädzle g´halde hen – manchmol had des a ä bissel länger dauere kenne – dann werd des mid´em soziale Midänanner immer weniger. Richdig schad drum!

In dem Briefle vom Dresel Ernschd kannsch a sähne, dasses ihm un seinere Fraa ned leichd falld, zu zu mache. Ernschd mir verschdehn des dodaal un mir winsched Eich, dass die Modore von dem g´schäfdsfiehrende Personal bal widder rund laafe un Ihr noch ä scheene Zeid vor Eich hen.

Wie hasch so schee g´schriwwe: „Bude zu, Affe krank, wir haben ferdig“. Mir misses laider agzebdiere un winsche Eich, dass „d´Flasch noch lang ned leer isch“!!!

Mached´s guud. Morje frieh werre des Brezel un des Weggle b´sonners genieße!!!

Eier Alderle,

- mid dem sicher viel däselbe Moinung sin.

Suchen
Sponsoren
Vereine
Wir helfen
Polizeiberichte der Region