Alderle ! Ab ins KJG - Lager

Erstellt am Samstag, 15. August 2015 13:06
Geschrieben von Stupfericher Alderle

Heid Morje war´s wie vor 21 Johr. Domols isch unser Markus zum erschde Mol mid ins Lager von de KJG g´fahre un heid Morje unser Enggele d´Celine.

D´Uffregung war fir uns domols nadierlich greeßer, als de Bu mid knabb 10e zum erschde Mol lengere Zeid von dähoim weg war. Heid hasch als Oba Zeid g´hedt d´ Kinner un d´Eldern zu beobachde, wie´se allesamd uffgreegd ware.

Die Oine in voller Erwardung un Vorfraid, was in denne 14 Daag so alles uff´se zukommd, un Gedangge ans Hoimweh ware sicherlich a scho däbei. Wenn de Samuel des im Film feschdhalde hed kenne, was de Annere, de Eldern, so alles durch de Kopf gange isch, hedd´er wahrscheinlich ä herrliche Dokumentation iwwa alles Meegliche erschdelle kenne.

Wenn in de ledschde Johr verfolgd hasch, was d´KJG do imma widda uffziehd, dann kannsch blooß de Hud ziehe. Was do an Vorberaidung alles zu mache isch, kann  sich en Ausseschdehender gar ned vorschdelle.

Also, jedzd sin´se ford uffem Wäg nach Saalbach un wenn die Bilder im Inderned oguggd hasch, wo se wohne, dann kannsch´de fir die Kinner blooß fraie.

Dass in denne 14 Daag koi Langweil uffkomme werd, do had de Christoph  un d´Marissa mid ihrem Tiem scho g´sorgd. Wenn dann  d´Martina mid ihrer Kiche-Mannschafd noch was G´scheids uff de Disch bringd, dann kannsch demid rechne, dass die Kids in zwai Woche aussem Bus schdierme un so wie domols unser Markus in d´Arm von ihre Eldern schderze un ausrufe: „Baba, Baba (odda a Mama, Mama) derfe nägschdes Johr widda mid“.

Scheene un abwägslungsreiche Daag winschd Eich

Eier Alderle